BFAR 6, wala pa sang nabaton nga reklamo angut sa isda nga ginpahayag naputos sang plastic

Iloilo — Wala pa sang reklamo nga nabaton ang Bureau of Fisheries and Aquatic Resources (BFAR) 6 angut sa isda nga ginpahayag naputos sa plastic.

Suno kay BFAR 6 Director Remia Aparri, ginapa-monitor na niya ang mga merkado sa rehiyon kasunod sang impormasyon. Gin-athag naman ni Aparri nga wala sang imported nga mga isda sa Western Visayas.

Una na nga nagreklamo si alyas Inday sang San Miguel nga nakabakal siya sang isda nga ginpahayag naputos sang plastic.

Suno kay Inday, tatlo ka kilo sang tamodyos ang iya ginbakal pero may nagpahibalo sa iya nga may plastic ang isda gani kinahanglan niya panitan kon lutuon. Tuman ka nipis suno sa iya ang plastic nga kapareho man sang panit sang isda. (AGB)