City Comelec, nagpahanumdom sang mga requirements sa pagbutang sang campaign materials sa common poster areas
Iloilo City — Mahimo mag-report paagi sa Iloilo City Comelec Hotline Number (033) 337-5901 ang sin-o man nga may ihibalo sa mga naglapas sa pagsulundan sa pagpangampanya.
Ang pahayag ginhimo ni City Comelec Election Assistant II Jonathan Sayno sa pagsugod na subong nga adlaw, Pebrero 12, sang kampanya sang mga nagakandidato sa national positions.
Gin-isa-isa man ni Sayno ang mga dapat kag indi dapat himuon sa kampanya:
1. Ginadumili ang pagtakud sang campaign materials sa guwa sang gindesignar nga common poster areas.
2. Ang poster dapat may nabutang nga “political advertisement paid for,” ngalan kag address sang kandidato; “political advertisement paid by” kag ngalan
sang nagbayad.
3. Dapat magsunod ang itakud nga campaign materials sa standard size nga 2×3 feet.
4. Ginadumili ang pagtabon sa campaign poster sang poster sang iban nga kandidato.
5. Ginadumili ang pagisi ukon pag-tamper sang campaign posters.
Ginpahayag ni Sayno nga kakason nila ang mga posters nga wala nabutang sa common poster areas.
Ginadumili ang pagtakud sa barangay halls, mga poste, taytay, kahoy, kag government structures.
Ginadumili man magtakud sa private properties kon wala nagasunod ang campaign posters standard size.
Bawal man suno sa iya ang mga streamers nga naga-welcome sa kandidato nga nagabisita bangud makabig man ini nga campaign advertisement.
Gindesignar sa syudad nga common poster areas ang:
A. City Proper – Plaza Libertad (facing J.M. Basa Street)
B. Arevalo – Plaza Villa (Rizal Street facing police station)
C. Jaro – Plaza Jaro (Rizal Street facing Andok’s Chicken)
D. Lapaz – Plaza Lapaz (facing Huervana Street and
police station)
E. Lapuz – Rizal Street, Barangay Lapuz Norte (in front of RoRo Terminal)
F. Mandurriao – Plaza Mandurriao (facing police station)
G. Molo – Plaza Molo (Locsin Street facing Consing Mansion)
Sa Marso 29 naman magasugod ang kampanya para sa mga local candidates. (AGB/MO)