E-bikes, indi makabig nga motorized vehicle – LTO 6

Iloilo City — Indi makabig nga motorized vehicle ang mga e-bikes nga nagabyahe sa syudad.

Paathag ni Land Transportation Office (LTO) 6 PIO Riza Otayde, para makonsiderar nga motorized vehicle, ang salakyan dapat ginagamitan sang gasolina ukon fuel-operated, kumpleto sa chassis number, engine number, kag rehistrado sa ila.

Ang e-bikes nga nagabyahe sa syudad suno Otayde, may pedal kag ginagamitan sang pwersa sang tawo. Makonsiderar man ang mga ini nga electronic vehicle.

Liwat gin-athag ni Ms Otayde nga ang mga e-bikes, “for personal use” lang kag “not for hire,” indi pwede mabutangan sang side car kag ma-biyahe. Antes naman ini ma-biyahe dapat magawaran sang prangkisa. Pero antes gawaran sang prangkisa ang salakyan, dapat rehistrado ini sa LTO.

Una na ginpahayag ni Otayde nga non-registrable ang e-bikes. Dapat suno sa iya nga i-propose sang mga suppliers sang e-bike sa LTO central office ang pagparehistro sang ila vehicle. Nagakadapat nga kumpletuhon sang suppliers ang mga papeles sa pagparehistro agud nga ma-aprubahan.

Sa subong, indi pa makapang-register ang LTO Western Visayas sa mga e-bikes bangud wala sang mandu halin sa ila central office. (AGB/KJT)