Pagsukot sang Dumangas District Hospital sang ER fee sa arrested persons sang Dumangas Police Station, ipa-verify sang Provincial Administrator

Iloilo — Luyag ni acting Provincial Administrator Atty. Suzette Mamon nga mahibaluan kun ano gid ang natabu sang ginsukot sang ER fee ang mga detainees sang Dumangas Police Station nga ginpa-check up sa Dumangas District Hospital antes ginpasulod sa custodial facility.

Sa pagkahibalo ni Mamon, kun regular ang pasyente kag may ikasarang magbayad, tuman ka minimal sang balayran santu sa Revenue Code.

Kun detainee naman nga wala sang ikasarang magbayad, puwede siya masakop sang medical assistance program sang probinsiya.

Plano ni Mamon nga istoryahan ang natabu upod sa Provincial Legal Office kag Hospital Management Office nga nagadumala sang mga district hospitals sa probinsiya agud maklaruhan ang tanan kag indi na masulit ang natabu. (AGB/MO)