(UPDATE) PO1 Dorben Acap Jr nga gintiro sang 2018, pasakaan sang PRO 6 sang grave neglect of duty bangud AWOL sang masobra na 30 ka adlaw

Iloilo City — Pasakaan sang grave neglect of duty sang Police Regional Office 6 si PO1 Dorben Acap Jr bangud Absent Without Official Leave (AWOL) sang masobra na 30-diyas.

Ini ang ginkunfirmar ni PRO 6 Spokesperson Superintendent Joem Malong.

Suno kay Malong, gin-subject sa summary hearing proceeding si Acap bangud wala naka-report bisan makapila ka beses na nga ginpadal-an sang Return To Work Order.

Nangin kontrobersiyal si Acap matapos gintiro sang Hunyo 26, 2018 kag suspek si PO2 Melvin Mocorro nga assigned naman sa Autonomous Region in Muslim Mindanao.

Duha ka mga suspetsado nga wala makilala sang police ang ginpasakaan ni Acap sang kaso upod kay Mocorro.

‘SICK-LEAVE?’

Setyembre 19,2018 sang una nga nag-file sang leave application si Acap. Nag-file pa gid siya sang sick leave extension sang Oktubre 31, 2018 base sa record sang PRO 6.

Wala na nagasanto ang ginahingyo nga leave application ni Acap sa iya recovery period suno kay Malong rason ginmandu-an nga magpa-check-up sa Regional Health Service apang napaslawan man.

Nauntat lang ang pagbaton ni Acap sang sweldo matapos nabaton ang order nga ipaidalum sa summary hearing proceeding ang iya kaso.

Ginakuhaan pa sang Aksyon Radyo Iloilo sang pahayag si Acap. (AGB/ATT)