Masobra 100 illegally posted campaign materials, ginpangkakas sa ‘Operation Baklas’ sang City Comelec

Iloilo City – 111 ka mga illegally posted nga campaign materials ang ginpangkakas sa ‘Operation Baklas’ sang Commission on Elections sa syudad kadungan sa pagsugod sang campaign period sa national candidates kahapon, Pebrero 12.

Suno kay Mr. Jonathan Sayno, Election Assistant II sang City Comelec, kaupod nila sa madinalag-on nga operasyon ang Task Force Asis sang city government kag mobile group sang Philippine National Police (PNP).

Nagsugod sa pagpangkakas ang team sa Mabini kag General Luna Streets, City Proper; naglabay sa Diversion Road, Mandurriao kag Sambag, Jaro diretso sa Jaro Plaza. Naglibot man sila sa E. Lopez Street, Jaro lapus sa Lapaz Plaza antes nagpadulong sa Plaza Libertad balik sa opisina sang City Comelec.

Kalabanan sa mga ginpangkakas ang mga campaign materials sa common poster areas nga wala sang ngalan kag address sang kandidato, ngalan kag address sang nagpa-imprinta kag oversized.

May ginpakakas man sa mga private properties bangud oversized ang napangtakod nga campaign materials.

Gin-athag naman ni Sayno nga ginadumilian ang pagtakud sang campaign posters sa mga public utility vehicles bangud may franchise sila halin sa gobyerno. Ginadumilian man ang mga government employees nga magsuksok sang mga items (pareho sang t-shirt kag ballers) nga may pangalan sang mga kandidato.

Ginpahibalo ni Sayno nga pwede mapreso ang mga violators sang Comelec rules kag pwede man nga madisqualify ang nagapadalagan nga kandidato.