Nagaputos sa tamudyos nga ginapatihan plastic, panit sang isda base sa examination sang BFAR 6

Iloilo City — Indi plastic ang naputos sa isda nga tamudyos nga ginbakal ni alyas Inday sang San Miguel.

Ini ang ginkumpirmar ni Bureau of Fisheries and Aquatic Resources ukon BFAR 6 Director Remia Aparri matapos ginpaidalum sa direct physical examination ang mga isda.

Sa examination sang laboratory staff sang ahensya, gin-athag ni Aparri nga “outermost layer of the skin” ukon epidermis sang isda ang ginpatihan naputos nga plastic.

Nakumpirmar man suno sa iya sa microscopy nga skin cell sang isda ang ginpahayag plastic.

Suno kay Aparri, masal-an nga plastic ang tuman kanipis nga panit ilabe na kun lab-as ang isda.

Una dire, ginpahayag ni Inday nga kun tulukon indi masuspetsuhan nga naputos sa plastic ang isda bangud nagalusot man ang himbis. (AGB/JGM)