PRO 6, wala nakilala ang mga lalaki nga ginpahayag nagpangkuha alahas, nagtanum ebidensiya kag nagliso sang CCTV camera sang pamilya Regalado; RDEU Team, ginrekomendar nga i-disband
Iloilo City — Wala nakilala sang Regional Investigation and Detective Management Division (RIDMD) ang mga lalaki nga ginpahayag nagpangkuha alahas, nagtanum ebidensiya kag nagliso sang CCTV camera sa balay sang pamilya Regalado kasunod sang kontrobersyal nga pagserbe sang search warrant sa miembro sang amo nga pamilya.
Suno kay PRO 6 Spokesperson Superintendent Joem Malong, base sa inisyal nga resulta sang imbestigasyon sang RIDMD, kulang ang mga ebidensiya nga natipon nila nga nagatudlo sa mga anay personnel sang RDEU.
Dugang niya, wala man sang testigo sa insidente bisan halin sa miembro sang pamilya Regalado.
Nagpangayo ang RIDMD sang certified true copy sang CCTV camera footage sa pamilya Regalado apang indi authenticated ang ila ginhatag.
Una na ginpanginwala sang mga natungdan nga RDEU personnel sa pagpanguna sang anay team leader nga si Police Senior Inspector Kennith Bermejo Jr. ang akusasyon batuk sa ila.
Ginakuhaan man sang pahayag sang RIDMD ang mga anay personnel sang PDEA 6 nga may kaangtanan sa kontrobersiyal nga pag-raid sa pamilya Regalado.
‘I-DISBAND ANG RDEU TEAM NI BERMEJO’
Ginrekomendar sang RIDMD ang pag-disband sang RDEU Team ni PSI Bermejo. Suno kay Malong, indi na pag-ibalik sa RDEU ang team ni PSI Bermejo kasunod sang kontrobersiya.
Dugang niya, imbestigaran man sang Regional Internal Affairs Service (RIAS) ang ginpahayag nga paglapas sa tawhanon nga kinamatarong sa amo nga raid.
Wala pa sang desisyon kun i-relieve ang natungdan nga mga pulis nga assign subong sa Regional Personnel Holding and Accounting Unit.
‘I AM INCLINED TO APPROVE IT’
Wala pa nadesisyunan ni Bulalacao ang rekomendasyon sang RIDMD bisan sang Pebrero 4 pa ginsumiter sa iya ang investigation result.
Dako ang posibilidad suno kay Bulalacao nga aprubahan niya ang rekomendasyon sang RIDMD.
Disyembre 13,2018 sang ginhimo sang PDEA 6 kag RDEU ang raid. (JoMaque)