16 anyos nga dalaga sa Cabatuan, patay na sang nasapwan sang iya ginikanan; suspek, wala pa makilala

Cabatuan, Iloilo — Wawa ang liog kag patal man ang pilas sa tiyan sang 16-anyos nga dalagita nga nasapwan patay sa iya kuwarto sa Zacarias Subdivision, Serrano Extension, Cabatuan pasado las singko kaina sang kaagahon, Pebrero 14.

Magluwas dire, may pilas man sa agtang ang biktima nga daw ginkuritan sang kutsilyo.

Suno kay alyas Gemma, tiya sang biktima, wala sang dugo sa kama kag ginapatihan nga sa salog sa diin nasapwan ang bangkay, ginhimo ang krimen.

Naga-isahanon nga bata ang biktima. Grade 10 student siya sa high school sa Cabatuan.

Nasapwan na lang siya sang iya ginikanan sang ginpukaw kaina sang kaagahon agud maghimos sa eskwela.

May nakit-an ang iloy nga si alyas Marilou sang pink nga sando sa bag sang dalagita pero indi iya.

Wala man suno sa iloy sang kontra ang iya anak.

Routine na sang dalagita nga maghapit sa ila kalan-an sa merkado sang banwa pagkatapos sang klase kag dire nagapanihapon upod sa iya pamilya.

Ginadul-ong siya sang iya amay sa ila balay pagkagab-i pero ginabayaan ang dalagita sa balay kag nagabalik sa tinda ang amay.

Natukiban sang pamilya nga nadula man ang liabe sa main door sang balay.

Ginpahayag naman sang pakaisa nga si alyas Reg, nga may nobyo ang biktima kag tatlo ka tuig na ang ila relasyon.

Dugang sang pakaisa, masami nga ginasakit sang nobyo nga out-of-school youth ang biktima bangud sa pagpangimon.

Sa pagkamatuod suno sa pakaisa, luyag na sang biktima nga bulagan ang nobyo pero indi magpasugot.

Nagapadayon ang imbestigasyon sang kapulisan sa krimen. (AGB/MO)