Calinog, ginrekomendar nga ‘red’ election hot spot –PRO 6 Spox

Iloilo City — Ginrekomendar sang Regional Joint Security Control Center ang Calinog bilang ‘red’ election hotspot.

Suno kay Police Regional Office 6 Spokesperson Joem Malong, base sa pinakaulihi nga record sang RJSCC, Calinog lang sa bilog nga rehiyon ang ginlista sa ‘red’ category ukon area of grave concern.

Nagakahulugan ini suno kay Malong nga may intense political rivalry ukon history sang election-related incident sa nakaligad nga duha ka eleksyon sa lugar (‘yellow’ category) kag may mga presensiya sang private armed group ukon New Peoples Army (‘orange’ category).

Padayon naman ang pag-validate sang mga tropa sang gobyerno sa amo nga impormasyon.

Ang RJSCC ginabug-usan sang Philippine National Police, Armed Forces of the Philippines kag Commission on Elections.

‘NAGSALINGASAG ANG PAHAYAG’

Una na ginpahayag ni PNP chief Director General Oscar Albayalde nga anum ang mga election hotspots sa Western Visayas nga sa ‘red’ category.

701 naman tanan ang election hotspots ukon 42% sa 1,634 ka mga syudad kag banwa.

Suno kay Malong, isa lang ka banwa ang ginsumiter nga record sang ila Intelligence Unit sa PNP National Headquarters angut sa election hotspots.

Posible naman nga kabahin sang historical data ang ginpresentar ni Albayalde.

‘PADAYON ANG PAGMONITOR’

Ginatun-an na sang PRO 6 kun ano ang i-deploy nga tropa sang gobyerno sa mga barangay sa Calinog nga ma-identify ‘difficult’ kag ‘very difficult’ areas.

Padayon man ang pag-monitor sang mga pulis lakip ang pagronda sang Philippine Army sa lugar.

Ginakuhaan pa sang pahayag sang Aksyon Radyo Iloilo ang Local Government Unit ukon LGU-Calinog angut sini. (JoMaque/AT)