City Council, ginhingyu sa PSTMO nga i-implementar ang traffic ordinances

Iloilo City – Ginhingyu sang City Council sa Public Safety and Transportation Management Office (PSTMO) nga i-implementar ang mga traffic ordinances sa siyudad.

Suno kay Councilor Joshua Alim, Chairman sang Committee on Police Matters, lakip sa ila ginhingyu sa PSTMO nga i-implementar ang Anti-Modified Muffler Ordinance kag Speed Limit Ordinance nga iya gin-author kag on-road parking.

Ginakwestiyon siya suno sa iya sang pila ka residente kon ngaa wala gina-implementar ang ginpasar nga mga ordinansa kabangdanan nga nagadamo ang aksidente sa dalanon kag nagakadisturbo.

Madamo pa suno sa konsehal sang mga traffic ordinance pero ang tatlo lang ang ginapauna implementar bangud daku ang mabulig sang mga ini agud mapahagan-hagan ang aksidente sa dalanon.

Ginpasar kahapon sang konseho ang resolution nga ipadala kay PSTMO Head Jeck Conlu.

Nagpahanumdom man si Alim nga may salabton ang natungdan nga opisina kon mapaslawan nga ma-implementar ang mga ginpasar nga ordinansa sang konseho. (JoMaque)