(UPDATE) Iloy sang 16 anyos nga dalagita sa Cabatuan nga ginpatay sa sulod sang ila balay, halos indi mabaton ang natabu sa iya naga-isahanon nga bata; pulis, may ginalantaw na nga mga persons of interest

Cabatuan, Iloilo — Daw indi mabaton sang iloy sang 16 anyos nga dalagita nga ginpatay ang iya anak sang wala makilala nga suspect sa sulod sang ila balay sa Zacarias Subdivision, Zone 10 Serrano Extension, Cabatuan sang Pebrero 13 sang gab-i.

Nagakayaon sa sulod sang iya kwarto si Inday sang nasapwan sang iya iloy nga si Marilou mga alas-5:30 kahapon sang aga.

Suno kay Marilou mga alas-9 sang gab-i sang Pebrero 13, gindul-ong sang iya amay ang dalagita sa ila balay pero nagbalik ang amay sa ila pwesto sa merkado.

Ginpahayag nga mga alas-11 nagpauli ang mag-asawa pero natingala nga wala na ang liyabe nga nabutang sa ila ginataguan gani gingamit sang bana ni Marilou ang duplicate key agud makasulod sila sa balay.

Nagasiga pa ang suga sa kwarto ni Inday pag-abot sang mag-asawa pero wala na nila gindisturbo.

Pukawon kuntani ni Marilou si Inday agud maghimos pa-eskwelahan sang nasapwan nga patay na ang dalaga.

May ginasunod na nga anggulo ang Cabatuan police sa natabu.

Suno kay PO3 Renan Lanado, imbestigador sang Cabatuan Police Station, gina-imbestigaran nila ang tanan nga anggulo sa natabu pero mas ginatutukan ang pagpangawat, rape kag pagpangimon sang ginpahayag nobyo sang dalaga.

Wala sang nakita ang SOCO nga bladed weapon sa kuwarto sang dalaga. (Ariel Solacito)