Anay guwardya, nakuhaan sang lain-lain nga mga pusil kag bala sang ginserbihan sang search warrant sang Dumangas police

Dumangas, Iloilo — Nakuhaan sang nagkalain-lain nga pusil kag mga bala ang anay security guard sang ginserbihan sang search warrant sa Barangay Cali, Dumangas kaina sang aga, Pebrero 15.

Suno kay Chief Inspector Jogen Suegay, hepe sang Dumangas Police Station, lakip sa na-recover nga pusil kay Salvador Divinagracia, 66 anyos, ang isa ka carbine; isa ka 9mm kag duha ka caliber 38.

Na-recover man ang apat ka magazine kag 16 ka bala sang 9mm; 13 ka bala sang carbine; kag 9 ka bala sang caliber 38.

Subject sang search warrant ang 9mm nga wala na-renew ang lisensiya pero wala ini na-recover. Lain man suno kay Suegay ang na-recover nga 9mm sa subject sang operasyon. (AGB/AS)