Manugbaligya mani, nasapwan patay kag may pilas sang pagkalabu sa liog sa Sara

Sara, Iloilo — Nasapwan nga patay na si Jemar Amoson, 27 sang Barangay Siempreviva, San Dionisio, sa likod balay sang iya tiyo sa Poblacion Ilawod, Sara mga ala-1:30 kaina sang hapon, Pebrero 15.

Suno kay PSINSP Ascencion Ortizo, hepe sang Sara MPS, ang tiyo nga si Randy Estoye ang nakakita sa bangkay sang nagpauli siya.

May pilas sang pagkalabu sa liog kag may pilas pa gid sa wala nga tiil si Amoson.

Sa imbestigasyon sang police, naghapit si Amoson sa iya tiyo agud magkuha sang dugang nga mani pero posible may naabtan nga nagapangawat gani nga ginlabu siya.

Robbery ang ginasunod nga anggulo sang mga pulis bangud nadula ang motorsiklo sang biktima.

Padayon ang imbestigasyon suno kay Ortizo agud makilala ang suspetsado. (AGB)