Imbestigasyon sang IAS sa kontrobersiyal nga pag-raid sa pamilya Regalado, posible untaton

Iloilo City (UPDATE) — Posible mauntat ang Internal Affairs Service sa ila imbestigasyon sa kontrobersiyal nga pag-raid sang mga personnel sang Philippine Drug Enforcement Agency 6 kag Regional Drug Enforcement Unit sa pamilya Regalado.

Suno kay Police Chief Inspector Manny Manuel sang Iloilo-IAS, ginalikawan nila ang ‘forum shopping’ sa amo nga isyu rason ma-coordinate anay sila sa Ombudsman.

Una na gin-report nga nag-file si Mrs. Candelaria Regalado sa Ombudsman for the Military and Other Law Enforcement Offices sang robbery, grave misconduct, oppression, conduct unbecoming of a police officer kag dishonesty batuk sa natungdan nga mga anay personnel sang RDEU kag PDEA 6 angut sa ginpahayag pagkuha sang alahas, pagtanum ebidensiya kag pagliso sang CCTV camera sang mga operatiba.

Nag-conduct sang moto propio investigation ang IAS suno kay Manuel kasunod sang pahayag ni Police Regional Office 6 Spokesperson Superintendent Joem Malong nga ma-conduct sila sang imbestigasyon base man sa rekomendasyon sang Regional Investigation and Detective Management Division kay PRO 6 Director Chief Superintendent John Bulalacao.

Una nga gin-imbestigaran sang RIDMD ang reklamo apang wala sila sang may nakita nga ‘concrete evidence’ nga nagatudlo sa mga anay personnel sang RDEU sa akusasyon sang pamilya Regalado.

‘DAPAT MAG-COORDINATE’

Ginpahayag naman ni National Police Commission ukon NAPOLCOM 6 Director Atty. Joseph Celis nga ‘excluded’ na ukon indi na dapat pag-ikonsiderar ang pag-conduct sang moto propio investigation sang natungdan nga ahensiya kun may napasaka na nga kaso sa iban pa nga mga ahensiya ukon forum.

Kun nauna naman ang pag-conduct sang motio propio investigaton sa pagpasaka sang kaso sa iban pa nga ahensiya ukon forum, dapat mag-coordinate ang naghimo sang moto propio investigation sa natungdan nga ahensiya ukon forum. (JoMaque/AT)