Grade 11 student sa Barotac Nuevo, nagreklamo nga gintuyo i-abduct sang mga nakasakay sa van

Barotac Nuevo, Iloilo – Nagpalanglapsi sa kakulba sang nag-abot sa iya eskwelahan ang Grade 11 student nga si alias Mimi, 16 anyos sang barangay Acuit, Barotac Nuevo, matapos ginpahayag nga gintuyo i-abduct sang tatlo ka nakasakay sa van kahapon, Pebrero 15.

Suno kay Mimi, nagdulog ang van nga duag green sa iya atubang samtang nagahulat siya sang tricycle pakadto sa eskwelahan mga las 8 sang aga.

Una ginbuksan sang babayi sa front seat ang pwertahan sang van kag ginpamangkot siya kon diin siya makadto kag nagsabat man siya nga mapa-eskwelahan na. inhambalan siya sang babayi nga masakay pero nagpamalibad siya.

May lalaki suno sa iya nga nagpanaog sa likod sang van nga may tabon nga panyo ang guya. Suno sa dalagita, ginhapulas sang lalaki ang iya buhok kag ginhambalan liwat nga magsakay sa salakyan pero nagpamalibad gihapon siya. Ginpahayag nga ginkaptan sang lalaki sang hugot ang iya buhok.

May naglabay naman nga tricycle gani iya ginparahan. Nagdali-dali balik sa van ang lalaki kag madasig nga naglakat ang salakyan.

Wala sang plate number ang van suno kay Mimi kag first time niya ini nga nakita. Indi niya man kilala ang mga sakay sini nga posible pangayaw bangud daw taga-siyudad ang tono sang panghambal.

Suno kay Mimi, na-trauma siya sa natabu kag ginakulbaan na nga maglagaw. Na-report na sang pamilya sa mga pulis ang natabu. (JoMaque)