WVRAA 2019, nagbukas na; ginabanta sa 500 ka pulis, gin-deploy agud masiguro ang malinong kag matawhay nga pahampang

Capiz — Nagbukas na ang Western Visayas Regional Athletic Association ukon WVRAA Meet 2019 sa Roxas City kahapon sang hapon, Pebrero 17.

Masobra sa 3,000 ka mga atleta, coaches, assistant coaches kag chaperones ang nagtambong sa opening ceremony sa Villareal Stadium.

Present sa opening ceremony ang lima ka gobernador sa Western Visayas nga ginalakipan nanday Governor Tony del Rosario sang Capiz, Governor Florencio Miraflores sang Aklan, Governor Rhodora Cadiao sang Antique, Governor Arthur Defensor sang Iloilo kag Governor Alfredo Marañon sang Negros.

Ang WVRAA meet 2019 nga may tema “Hampang nga may Paghili-usa, Ipasanyog sa Aton Banwa” ang magapili sang pinakamaayo nga atleta sa rehiyon 6 nga amu ang magapasakup sa 2019 palarong pambansa.

Ang WVRAA meet 2019 magatakup sa Pebrero 23.

Ginabanta sa 500 ka pulis ang gindeploy agud magbantay sa kalinong sang WVRAA 2019.

Suno kay Senior Supt, Canilo Fuentes, Provincial Director sang Capiz Provincial Police Office, naka-alerto ang kapulisan agud magbantay sa seguridad sang mga delegado.

Magluwas sa pagpahamtang sang police assistance desk sa kada billeting area, may mga nagapatrolya man nga mga police personnel. 

Nag-apelar si Fuentes sa mga delegado nga mangin mahinalungon sa ila mga pagkabutang agud indi makawatan. (JoMaque)