Mga mangunguma, indi mabutang sa disbentaha sa ginpirmahan nga Rice Tarrification Act suno sa DA 6 director

Iloilo City — Indi mabutang sa disbentaha ang mga local rice producers sa pagpirma na ni Presidente Rodrigo Duterte sang Republic Act 11203 ukon ang Rice Tariffication Act.

Ini ang paglantaw ni Department of Agriculture Regional Executive Director Remelyn Recoter.

Suno sa iya, gin-imbitar sila sang DA Secretary para diskusyunan ang implementing rules and regulations (IRR) sang kasuguan.

Istoryahan man suno sa iya ang mga safety nets sa farming sector ilabe na sa rice industry.

Sa pag-aprubar sang kasuguan, ginalantaw sang gobyerno nga makabenepisyo ang mga kunsumedor bangud magabaha suno sa iya ang bugas kag magabarato ang presyo.

Sugod Marso 3, may tariffa na sa imported nga bugas.

Ang RA 11203 nagkakas sa import quota kag maga-epekto na ang tariff rates nga:

*35 percent kun ang bugas gin-import halin sa Asean

*40 percent kun ang bugas nakasulod sa minimum access volume (MAV) nga 350,000 metric tons halin sa mga pungsod sa guwa sang Asean

*180 percent kun lapaw sa MAV kag naghalin sa non-Asean country

Una na ginpahayag ni Finance Secretary Carlos G. Dominguez III nga katuyuan sang pag-liberalize sa rice imports ang pagpanubo sa presyo sang bugas.

Suno kay Dominguez, 50 porsiento nga mas mataas ang presyo sang bugas sa pungsod ikumparar sa iban lakip ang Singapore nga wala naga-produce sang bugas.

Gin-ayo man ni Dominguez sa National Economic and Development Authority nga hibaluon kun ano nga pondo ang puwede mapagguwa sa pag-restructure sang National Food Authority agud masiguro nga makabaton sang suporta ang mga mangunguma samtang gina-set up pa ang Rice Competitiveness Enhancement Fund nga gina-mandate sa idalum sang Rice Tariffication Act. (AGB/MO)