Coun. Joshua Alim, nagpa-blotter matapos ginpahayag nga ginpangkakas sang anay kapitan ang iya mga posters sa Mandurriao; Anay kapitan, nagdepensa

 

Mandurriao, Iloilo City – Nagpa-blotter sa Mandurriao Police Station si Councilor Joshua Alim matapos nag-alegar nga ginpangkakas ang iya mga posters sa Barangay Sta. Rosa, las- 6: 35 kagab-i, Pebrero 19.

Suno kay Alim, nadakpan ni Engr. Ras Borja si anay PHHC Block 17, Mandurriao Punong Barangay Boyet Rico nga nagpangkakas sang iya posters.

Nagpakilala pa suno kay Alim si Rico kay Engr. Borja kag gina-claim niya nga iya ang propiedad nga ginapahamtangan sang posters sang konsehal.

Nagpahayag pa si Alim nga iya lang posters ang ginpangkakas ni Rico kag nabilin ang posters nanday Cong. Jerry kag Councilor Jay Treñas.

Duha ka beses na suno kay Alim nga natabu ang pagpangkakas sang iya posters pero wala niya nahibaluan kon sin-o ang una nga nagpangkakas.

Ginatun-an pa sang kampo ni Alim ang legal nga tikang batuk kay Rico.

‘SABAT NI RICO’

Ginapanindugan naman ni Rico nga iya ang propiedad nga ginbutangan sang posters.

Kuntani suno sa iya naglisensiya sa iya antes ang pagbutang sang posters.

Nagalaum siya nga mahangpan ni Alim ang iya ginhimo. (JoMaque)