DSWD 6, nag-athag nga indi nila empleyado ang babaye nga nakita sa advertisement sang kandidato sa probinsya sang Iloilo

Iloilo City — Nagpaguwa sang statement ang Department of Social Welfare and Development 6  angut sa advertisement sang kandidato sa probinsya sang Iloilo nga matan-aw sa TV, Facebook kag Youtube.

Kasunod ini sang nakita sa video nga babaye nga nakasuksok sang tshirt nga may DSWD logo.

Suno kay DSWD 6 Information Officer Mae Rago, indi konektado sa DSWD ang babaye kag wala man sang pahanugot ang pagamit sang ila logo sa advertisement.

Ginpanindugan sang DSWD nga non-partisan kag apolitical ang ahensya kag wala sang ginadampigan ukon gina-endorso nga kandidato.

Ginpahanumdom ni Rago ang mga benepisaryo sang Pantawid Pamilyang Pilipino Program, social pension, sustainable livelihood program KALAHI kag iban pa nga programa sang ahensya nga indi sila makakas sang sin-o man nga pulitiko kag DSWD lang ang makahimo sini. (AGB)