Lalaki, pilason matapos nasalabat sang nagpalupok ang riding-in-tandem sa checkpoint sa Barotac Viejo

Barotac Viejo, Iloilo— Pilason ang 18-anyos nga lalaki matapos nasalabat sang nagpalupok sang pusil ang riding-in-tandem sa checkpoint sa Barangay San Lucas pasado alas otso kagab-i, Pebrero 19.

Suno kay Chief Inspector Joven Arevalo, hepe sang Barotac Viejo Police Station, ginkilala ang biktima kay Emmanuel Badilis sang amo man nga lugar nga napilasan sa wala nga hawak.

Nagatindog sa guwa sang computeran ang biktima sang natabu ang insidente.

Dugang ni Arevalo nga gulpi lang nga nagliko ang motosiklo sa checkpoint kag nagpalupok sa mga pulis.

Nakabalos tiro ang mga pulis kag ginlagas ang motorsiklo apang wala gid naabtan.

Wala sang may napilasan sa mga pulis samtang gindala sa ospital ang nasalabat nga biktima. (JoMaque)