Modernized jeepneys, mabiyahe na sa Iloilo City suno sa transport group CLIAJODA

Iloilo City — 25 ka modernized jeepneys ang magasugod sa pagbiyahe sa syudad.

Suno kay Mr. Rizal Alido, presidente sang City Loop of Integrated Alliance of Jeepney Owners and Drivers’ Association (CLIAJODA) kag Board Secretary sang Iloilo City Alliance Operators and Drivers Transport Cooperative (ICAODTC), ginatapos na lang nila ang pagproseso sang mga papeles agud makabiyahe na ang modernized jeepneys sa Marso subong nga tuig.

Tatlo ka ruta ang agyan sang modernized jeepneys: Ungka ITGSI via CPU-Diversion Road; Jaro CPU kag Villa, Arevalo.

Air conditioned ang modernized jeepneys nga maga-operate 16 ka oras. Magabulos-bulos ang duha ka drivers sa kada unit. Dugang ni Alido, may fixed nga sweldo ang mga drivers kag kumpleto man sa benepisyo.

Posible naman nga may duha ka pesos nga saka sa regular nga pletehan ang plete sa modernized jeep.

Masobra P2 million ang balor sang kada unit sang modernized jeepney nga ginbakal sang kooperatiba. (AGB/KJT)