Pototan, may pinakamadamo nga putot nga kabataan sa Iloilo bangud kulang sa nutrition –PHO

Iloilo – Nagpanguna ang Pototan sa mga kabanwahanan sa probinsiya nga may madamo sang putot ukon stunted growth nga kabataan base sa latest survey nga ginpaguwa sang Iloilo Provincial Health Office (PHO).

Suno kay Dr. Ma Socorro Quiñon, gintakus ang timbang kag kataason sang kabataan nga naga-edad sang 0 to 59 months.

Nagaguwa nga madamo sang putot nga kabataan nga na-record sa Pototan, ginasundan sang Badiangan, Carles, Alimodian, Leganes, Batad, Lemery, Bingawan, Concepcion kag Estancia bangud kulang sa nutrition.

Ginpaathag ni Quiñon nga naka-depende ang mangin height sang kabataan sa ginakaon sang iloy samtang sila ang nagabusong.

Dugang pa niya, ang pagka-putot indi lang bangud sa genes kundi sa nutrition nga ginahatag sang iloy ilabe na ang iya ginakaon sang siya ang nagabusong. Daku man ang posibilidad suno kay Quiñon nga kon putot ang bata, mag-mango siya bangud kulang sa nutrition.

Ginpasiguro sang PHO nga ginatutukan nila ang proper nutrition sa probinsya ilabe na ang mga nagabusong.

Dapat man suno sa iya nga suportahan sang local government units ang pag-address sa problema sa malnutrition paagi sa pagpain sang budget agud malab-ot ang handom sang gobyerno nga mangin healthiest ang mga Filipinos sa Asya sa 2040. (JoMaque)