Mga benepisyo sa Philhealth, ma-access na sang tanan nga Filipinos base sa Universal Health Care Law suno sa Philhealth 6
Iloilo City — Awtomatiko na nga mangin miembro sang Philippine Health Insurance Corporation (Philhealth) ang tanan nga mga Filipinos.
Kasunod ini sang pagpirma na ni Presidente Rodrigo Duterte sang Universal Health Law.
Suno kay Philhealth VI public information officer Janimhe Cam-Jalbuna, bisan wala sang Philhealth ID, maka-access ang mga Pinoy sa serbisyo para sa ikaayong lawas.
Sa idalum sang kasuguan, may duha ka categories sang mga miembro suno kay Jalbuna–ang mga direct kag indirect contributors.
Ang direct contributors amo ang mga may kapasidad magbayad sang premium pareho sang mga migrant workers, professionals, self-employed, mga lifetime members (retirees kag pensioners nga nagbayad sang nagatrabaho pa sila) kag iban pa nga sakop sang formal economy.
Ang mga indirect contributors naman amo ang mga miembro nga gina-subsidize sang gobyerno ang premium pareho sang mga indigent, senior citizens kag sponsored program members nga ginabayaran naman sang LGUs ukon iban nga private entities.
Nasaad man sa bag-o nga kasuguan ang penalidad sa mga empleyado nga magamulta sang 3% kag sa mga self-earning ukon professionals nga magamulta sang 1.5% para sa wala nabayaran nga premium.
Ang benepisyo suno kay Jalbuna, mahimo ma-avail sa pribado kag pampubliko nga ospital.
Naga-apply gihapon sa Universal Health Law ang “No Balance Billing.” Sa idalum sini wala sang balayran ang mga pasyente nga na-confine sa basic ukon ward accommodation kun magguwa na sa ospital.
Makabig nga dependents ang mga bata nga manubo sa 21 ang edad pero paglapaw sa sini nga edad, kinahanglan may kaugalingon na sila nga Philhealth membership.
Nasaad man sa kasuguan ang premium para sa masunod nga pito ka tuig.
Gin-ako ni Jalbuna nga may pagsaka sa premium sang tubtob sa lima ka porsiento pero iya ginpasiguro nga sa kada pagsaka sang premium, may increase man kag expansion sa benepisyo nga mabaton sang mga miembro. (AGB/MO)