Modernized jeepneys, handa na nga mag-operate sa Iloilo City –CLIAJODA

Iloilo City (UPDATE) – Handa na nga mag-operate ang modernized jeepneys sa syudad.

Suno kay Mr. Rizal Alido, presidente sang City Loop Integrated Alliance of Jeepney Owners and Drivers’ Association (CLIAJODA) kag Board Secretary sang Iloilo City Alliance Operators and Drivers Transport Cooperative (ICAODTC), kumpleto na ang mga papeles sa pag-biyahe sang modernized jeepneys.

Sa pagkamatuod suno sa iya, sang nagligad nga tuig pa natapos ang ila pagproseso sang mga papeles pero naatrasar ang pagsugod sang operasyon bangud naulihi proseso ang papeles para sa garahe kag terminal.

Tatlo ka ruta ang agyan sang modernized jeepneys: halin sa Ungka ITGSI via CPU-Diversion Road; Jaro CPU kag Villa, Arevalo. 24 tubtob 25 ang seating capacity sang kada unit kag may lugar pa sa mga nagatindog.

Posible suno kay Alido nga may adjustment sa pletehan sa diin P10.00 tubtob P12.00 ang minimum sa una nga apat ka kilometros kon mag-umpisa na biyahe ang air conditioned nga modernized jeepneys.

Una nga ginpahayag sang grupo nga ginalauman nga maga-umpisa ang operasyon sa una ukon ikaduha nga semana sang Marso, 2019.

Bukas suno sa iya ang kooperatiba sa iban nga operators pero dapat nga magsunod sila sa ginapatuman nga pagsulundan. (JoMaque)