(UPDATE) SPO3 Norman Espina nga in-charge sa Finance Section sang Iloilo Police Provincial Office, nag-ako nga nakainom sang naaksidente sa Cagbang, Oton

Iloilo — Gin-ako ni SPO3 Norman Espina, assigned sa Finance section sang Iloilo Police Provincial Office (IPPO) nga naka-inum siya samtang nagamaneho sang iya salakyan gani nadalasa ang tatlo ka tricycle patrol nga naga-park sa higad sang karsada sa Brgy. Cagbang, Oton kagab-i, Pebrero 20.

Ginrason sang pulis nga napiyungan siya samtang nagamaneho

Pero ginpanghiwala ni Espina nga ginbuyayaw niya si Punong Barangay Ronnel Caso.

Nagpangayo naman sang pasensya si Espina kay Kapitan Caso kag handa siya nga magpakig-areglo sa punong barangay.

Handa man siya nga ipakay-o ang mga nadalasa niya nga tricycle.

Ginpabutyag naman ni Kapitan Caso nga maga-file siya sang reklamo sa National Police Commission bangud sa ginhimo sa iya ni Espina.

Ginmandu-an na ni Iloilo Police Provincial Office Director Sr. Supt Marlon Tayaba ang Investigation and Detection Management Division nga imbestigaran ang reklamo batuk sa pulis. (AGB/JGM)