(UPDATE) SPO3 Norman Espina, ginpa-imbestigaran sang PRO 6 Director matapos ginreklamo nagbuyayaw sang punong barangay sa Oton

Camp Delgado, Iloilo City — Ginmandu ni Police Regional Office 6 Director PCSUPT John Bulalacao nga imbestigaran si SPO3 Norman Espina nga ginreklamo nagsalakay sa mga tricycle lakip ang patrol vehicle kag nagbuyayaw sa punong barangay sang Cagbang, Oton sang Pebrero 20 sang gab-i.

Ini ang ginconfirmar ni PRO6 Spokesperson PSupt. Joem Malong matapos nakalab-ot sa Kampo Delgado ang reklamo batuk kay Espina nga assign sa Finance Department sang Iloilo Police Provincial Office.

Sensitibo suno sa iya ang pamunuan sang PRO6 sa reklamo batuk sa mga pulis gani ginmandu ang imbestigasyon.

Hulaton naman sang PRO6 ang resulta sang imbestigasyon nga ginahimo sang IPPO batuk kay Espina.

Dapat nga mapapanaugan sang penalidad si Espina suno kay Malong kon mapatud-an nga may sala siya. (AGB)