WVRAA 2019, nagtakup na; Negros Occidental, nagpanguna sa medal tally sa elementary level; Iloilo, nagpangibabaw naman sa secondary level

Roxas City, Capiz — Natapos na ang Western Visayas Regional Athletic Association Meet nga gin-host sang Roxas City kag ginhiwat ang closing ceremony kaina sang hapon, Pebrero 22.

Suno kay DepEd 6 public information officer Lea Belleza, natapos na ang mga championship games kabangdanan nadesisyunan nga tempranuhon ang closing program. Gindayaw ni Belleza ang madinalag-un nga pag-host sang Capiz sa hinampang sa diin may mga record breakers sa pila ka events.

Sunod nga tutukan sang mga atleta ang Palarong Pambansa sa Davao sa Abril 27 tubtob Mayo 4.

Wala na sang gindeklarar nga overall champion.

Sa final medal tally, nagpanguna ang Negros Occidental sa elementary level nga may 78 gold, 57 silver kag 35 bronze medals. Nagapangaduha ang Iloilo nga may 48 gold, 54 silver kag 48 bronze. Ikatatlo ang Capiz nga may 10 gold, 18 silver kag 33 bronze medals; ikaapat ang Aklan nga may 6 gold, 7 silver, 23 bronze medals; ikalima ang Guimaras nga may 5 gold, 10 silver, 22 bronze medals kag ikaanum ang Antique nga may 4 gold, 5 silver, 13 bronze medals.

Sa secondary level, nagapanguna ang Iloilo nga may 99 gold, 73 silver, 45 bronze medals. Ikaduha ang Negros Occidental nga may 83 gold, 84 silver, 55 bronze medals; ikatatlo ang Aklan nga may 17 gold, 32 silver kag 61 bronze medals; ikaapat ang Capiz nga may 12 gold, 12 silver, 38 bronze medals; ikalima ang Antique nga may 10 gold, 10 silver, 31 bronze medals samtang ikaanum ang Guimaras nga may 5 gold, 14 silver, 35 bronze medals. (AGB)