(UPDATE) Ginhaboy nga explosive sa waiting shed sa Alimodian, granada kag indi IED suno sa police; motibo sa natabu, gina-imbestigaran pa

Alimodian, Iloilo — Padayon pa nga ginapadalman sang kapulisan ang paghaboy sang riding-in-tandem sang MK2 fragmentation hand grenade sa waiting shed sa Barangay Bancal, Alimodian pasado las otso kagab-i, Pebrer 22.

Suno kay Police Lt. Danilo Noca, hepe sang Alimodian Police Station, isa sa gina-imbestigaran nila ang parte sa hiligut-anon sa quarry operation sa banwa.

Base sa impormasyon, may konflikto sa pagpahanugot sa alagyan sang mga trucks sa quarry operation nga ginpasugtan ni Punong Barangay Ronil Cabalfin sang Baguingin-Lanot pero ginapamatukan sang pihak nga grupo.

Masami nga naga-istambay sa waiting shed ang kapitan bangud maayo ang network signal sa area. Wala sa waiting shed ang kapitan kagab-i pero na na-damage ang ginbilin niya nga motorsiklo.

Ginpabutyag naman ni Cabalfin nga wala siya sang kontra kag wala man sang nabaton nga pamahog sa kabuhi. Handa siya magbulig sa imbestigasyon sang Alimodian police angut sa insidente. (AGB)