10 ka tuig nga bata nga babaye nga na-hit and run sa New Lucena, napatay samtang ginabulong sa ospital

New Lucena, Iloilo – Napatay samtang ginabulong sa ospital ang 10 ka tuig nga bata nga na-hit and run sa Barangay Pasil kahapon sang aga, Pebrero 23.

Suno kay PO3 Rodel Umahag sang New Lucena Police Station, nagtabok sa dalan sa boundary sang Pasil kag Inagdangan, Zarraga si alyas Mae sang nabungguan.

Nakita na lang sang iya iloy nga nagahuray-ad kag duguon ang biktima sa dalan matapos nga siya ang nakabati sang lagapok.

Ginatipon na sang New Lucena police ang kuha sang CCTV cameras agud makilala ang driver sang salakyan nga nagbunggo sa biktima.

Duha ka salakyan suno kay Umahag ang ila padayon nga ginakilala lakip ang puti nga pick-up kag itom nga SUV.

Nagahilibion naman nga nagapanawagan ang tiya sang biktima sa suspect nga magsungka.

Indi na suno sa iya makahambal ang iloy ni Mae bangud sa kasubo kag pagpangalisod. (JoMaque)