1 patay, 3 pilason matapos nakabunggo ang 2 motorsiklo sa truck sang tubo sa Anilao

Anilao, Iloilo — Isa patay kag tatlo pilason matapos nakabunggo ang duha ka motorsiklo sa truck sang tubo sa Barangay Camiros, Anilao kagab-i, Pebrero 24.

Ginkilala ang napatay kay Efren dela Cruz Jr, 29 samtang napilasan ang iya angkas nga si Mark Labrador, 25. Pilason man sanday Oscar Dellera, 39, driver sang motorsiklo kag iya angkas nga si Russel Pasano, 18 mga residente sang Aglalana, Passi City.

Suno kay Chief Inspector Ciriaco Esquilarga, hepe sang Anilao Police Station, nagpalumba-anay ang duha ka motorsiklo halin sa Anilao kag pauli na kuntani sa Passi City.

Nakita man suno sa iya sang driver sang truck nga si Rodulfo Araquel, 68 sang Palaypay, Anilao ang pagpalumba-anay sang duha ka motorsiklo gani nga nagpundo siya.

Ginpahayag nga madasig ang padalagan sang mga motorsiklo kag nakabunggo sa truck.

Dead-on-arrival sa ospital si Dela Cruz samtang padayon naman nga ginabulong ang tatlo ka napilasan.

Preso sa Anilao Police Station si Araquel. (JoMaque)