2 patay, 2 pilason sa shooting incident sa tunga sang mga soldado kag mga magpaka-isa sa Laua-an,Antique

Antique – Duha ang patay samtang duha ang pilason kasunod sang shooting incident sa tunga sang mga soldado kag apat ka magpakaisa sa Barangay Pandanan, Laua-an kagab-i, Pebrero 23.

Suno kay Police Lieutenant Colonel (Superintendent) Alexander Rosales, hepe sang Laua-an Police Station, nag-inom inom ang mga soldado sa ila bunk house bangud birthday sang upod nila sang nag-abot ang mga magpaka-isa nga kanday Gilbert Necor, 31-anyos ; Jeorge Lavega, 40-anyos; Christopher Lavega, 38-anyos; kag Jeoffrey Legaspi, 25-anyos,lunsay pumuluyo sangt Barangay Virginia, kag nagupod man sa ila pag-inom.Ginpahayag hinali lang gintiro sang barangay treasurer nga si Necor si Private First Class Kim Jeson Cordero, 24-anyos sang Lanao Del Sur tubtob nga nag-intra man sa komosyon ang iban.

Gindala sa ospital si Cordero apang napatay.

Pilason man kanday Private First Class Jason Espiel sang Surigao Del Sur kag Corporal Miguelito Perez, 30-anyos sang Negros Occidetal kasunod sang insidente.

Gindala sa ospital sa San Jose, Antique si Espiel nga estable na ang kondisyon samtang out-patient naman ang ila team leader nga si Perez.

‘MAY PATAY MAN’

Napatay man ang barangay tanod nga si Jeorge Lavega, kasunod sang insidente.

Suno kay Rosales, wala pa natul-id kun paano natiruhan kag kun sin-o ang nakatiro kay George Lavega.

Narecover man kay Necor ang ginpahayag .357 homemade magnum.

Gilayon naman nga nagpalagyo ang barangay kagawad nga si Christopher Lavega kag Legaspi.

Ang Barangay Pandanan ang ginabanta 30 kilometros ang kalayuon sa Poblacion sang Laua-an.

Nagabantay sa construction facilities kag equipment sang gina-obra nga farm-to-market road ang mga soldado sa amo nga barangay. (JoMaque)