(UPDATE) Daan nga hiligut-anon, ginasunod nga motibo sa tiruhay sa tunga sang mga soldado kag magpakaisa sa Laau-an, Antique sa diin duha ang patay

Laua-an, Antique —  Daan nga hiligut-anon ang ginatudlo motibo sa shooting incident sa bunk house sang Philippine Army sa Barangay Pandanan, Laua-an, antique sang Sabado sang gab-i, Pebrero 23.

Sa imbestigasyon sang Laua-an police, ginpahayag ni PSUPT Alexander Rosales, hepe sang Laua-an MPS, nga nakaagi nga ginsita sang suldado ang lalaki nga napatay sa insidente. Suno kay Rosales, Disyembre sang nagligad nga tuig sang ginsita sang suldado ang barangay tanod nga si George Lavega bangud sa pagbitbit sang pusil.

Pero gina-establisar pa sang Laua-an police kon sin-o ang nagtiro kay Lavega.

May testigo naman ang kapulisan nga ang nadakpan nga si Gilbert Necor, 31 anyos, barangay secretary sa Barangay Virginia kag pakaisa sang napatay nga si George Lavega, ang nagtiro patay kay PFC Kim Jeson Cordero, 24 anyos sang Lanao del Sur.

Sabado sang gab-i sang nagpadulong si Lavega upod ang iya mga pakaisa nga sanday Necor, Christopher Lavega kag Jeoffrey Legaspi sa bunk house sang mga suldado nga nagabantay sang mga heavy equipment sa gina-obra nga farm-to-market road sa barangay.

Ginpahayag nga naabtan nila ang mga suldado nga naga-inom bangud ginpahayag nga may naga-birthday. Base sa impormasyon ni Rosales, nag-intra man inom ang magpakaisa sa mga suldado tubtob nga nagluntad ang inaway.

Pilason sa insidente sanday PFC Jason Espiel sang Surigao del Sur kag Corporal Miguelito Perez, 30-anyos sang Negros Occidental.

Nagapabilin nga at-large sanday Christopher Lavega kag Jeoffrey Legaspi. (AGB/ATT)