(UPDATE) Bata nga nagtiro patay sa iya amay sa Lambunao, nagsurrender; nanginwala nga hungod niya nga gintiro ang amay

Lambunao, Iloilo — Nagsungka sa mga pulis ang 31-anyos nga anak nga nagtiro-patay sa iya 57-anyos nga amay sa Barangay Panuran, Lambunao sang Pebrero 23.

Pero suno kay Titoy Lastimoso, indi niya hungod nga tiruhon ang iya amay nga si Jimmy.

Sang amo nga gab-i suno sa iya, naglisensiya ang amay nga matulog sa balay sang lolo ni Titoy. Nagalumon ang biktima sa balay ni Titoy.

Ginpahayag ni Titoy nga makaligad ang lima ka minutos nga naglisensiya ang iya amay, gintuon niya ang iya pusil sa berha kag gintiro sa direksyon sang kawayanan.

Wala nakahibalo ang anak nga yara pa ang iya amay kag naigo sang bala sang dedose nga iya ginpasalba.

Suno kay Titoy, wala siya sang kaakig sa amay.

Sa pagkamatuod, ginbalutbot pa niya ang iya amay kag ginsabak kag ginhambalan nga indi hungod ang pagtiro niya.

Ginhambalan siya sang amay nga indi pagpabay-an ang iya apo samtang nagatagumatayon.

Napatay ang amay sa sabak sang anak.

Nagpalagyo si Titoy kag ginbilin ang amay sa kahadlok nga patyon man siya sang iya katiyuan.

Gin-athag ni Titoy nga sala ang ginpa-blotter sang iya mga tiyo parte sa natabu.

Base sa una nga impormasyon, naakig si Titoy sang nagpangayo sang sud-an nga adobo, bisan ulo lang sang manok, ang amay para may isud-an man siya. Nagguwa man ang impormasyon nga may dumot ang bata sa amay bangud ginapintasan sila sang gamay pa.

Gin-deny ini tanan ni Titoy.

Kagab-i, Pebrero 25, nagsurrender si Titoy sa bulig sang iya ugangan. 

Wala na sang plano pa ang pamilya nga kasuhan si Titoy.

Suno kay PO2 Jessie Fusin, imbestigador sang Lambunao Police Station, posible kasuhan sang parricide ang suspek. (AGB/ATT)