(UPDATE) Punong barangay sa Oton nga una nagreklamo ginbuyayaw sang pulis, nag-isol sa pagpasaka sang kaso sa Napolcom

Iloilo City — Nag-isol sa pagpasaka sang kaso sa National Police Commission 6 ang punong barangay sang Cagbang, Oton nga una na nagreklamo ginbuyayaw sang pulis.

Suno kay Punong Barangay Ronnel Caso, sinsero sa pagpangayo sang pasaylo si Police Chief Master Sergeant (SPO3) Norman Espina rason nga indi na siya magpasaka sang kaso.

Ginpanginwala naman ni Caso nga may gintanyag nga kabaylo si Espina rason nagpa-areglo siya.

Una na gin-ako ni Espina nga naka-inom siya sang nag-drive sang iya salakyan antes nagluntad ang aksidente sang Pebrero 20.

‘DAW WALA AKO SA AKON PAMINSARON’

Gin-ako ni Espina nga nabuyayaw niya ang punong barangay.

Suno sa iya, wala siya sa iya paminsaron sang nagluntad ang insidente.

Matandaan, gin-ako man ni Espina nga napiyungan siya samtang naga-drive sang iya Avanza rason nasalakay ang tatlo ka mga tricycle nga naga-park sa higad sang karsada.

‘DAYON ANG IMBESTIGASYON’

Bisan nag-atras si Punong Barangay Caso sa pagpasaka sang kaso, magapadayon naman ang NAPOLCOM 6 sa ila imbestigasyon sa insidente.

Suno kay Felix Leo Loriega, head sang Regional Investigation Unit sang NAPOLCOM 6,ma-conduct sila sang motu propio investigation agud matul-id ang mga posible paglapas ni Espina.

Si Espina ang assign sa Finance Division sang Iloilo Police Provincial Office. (AGB/ATT)