21-anyos nga lalaki, dakup sa buy bust operation sa Arevalo

Arevalo, Iloilo City – Dakup sa drug buy bust operation si John Louwell Roniella, 21 anyos sa Sto. Niño Norte, subong nga gab-i, Pebrero 28.

Tatlo ka sachets sang suspected shabu kag P1,100 nga buy bust money ang na-recover kay Roniella.

Suno kay Police Staff Sergeant Leonard Aquiatan sang Arevalo Police Station, madugay na nga gina-monitor ang illegal nga aktibidad sang subject.

Nadakpan suno kay Aquiatan ang kaupod ni Roniella nga ginpahayag nagabaligya sang marijuana sang nagligad nga bulan kag ginatudlo ang subject nga nagasuplay sa iya sang illegal nga droga.

“NAG-AKU”

Nag-aku si Roniella nga nagabaligya siya sang illegal nga droga.

Ginatudlo niya si Jappy Deita nga naga-suplay sang iya ginabaligya nga suspected shabu.

Dugang niya nga mga pangayaw ang iya mga kliyente.

“KAAGI PRESU ANG SUBJECT”

Ginkumpirmar ni Sto. Niño, Arevalo Barangay Kagawad Rolando Robles nga kaagi na presu si Roniella.

Nakuhaan sadto suno kay Robles sang pusil si Roniella sang menor-de-edad pa siya. (JoMaque)