(UPDATE) 15 anyos nga solterito sa Arevalo nga naghimo-himo istorya bangud sa Momo Challenge, ipalantaw sa psychiatrist

Iloilo City — Ipalantaw sa psychiatrist ang 15 anyos nga solterito nga nag-ako nga nag-imbento lang sang istorya bangud sa “Momo challenge.”

Una nga gin-alegar ni alyas Toto nga puwersa siya nga ginpasakay sa van sa Arevalo kag gindala sa gina-construct nga balay sa San Miguel pero nakapalagyo.

Sa iya nga panaysayon, nakita ni Toto sa balay ang ginabanta 30 pa ka kabataan nga ginpaduko kag nagahilibion. Ginpahayag may nakita man siya nga mga internal organs nga naputos sa plastic. Pero sang ulihi, nag-ako ang solterito sa mga pulis nga himo-himo niya lang ang istorya bangud sa nasambit nga suicide game.

Suno kay Toto, ginsugo siya ni Momo nga magdalagan halin sa ila balay sa Arevalo kagab-i, Pebrero 28, padulong sa Hibao-an Norte, Mandurriao kag magbalik naman sa ila balay kag magpalipong-lipong.

Nagpangayo na sang pasensya sa mga pulis si Toto sa iya ginhimo.

Ginrason sang solterito nga mapatay siya kon indi niya pagtumanon ang ginasugo sa iya sa Momo challenge. (AGB/JGM)