(UPDATE) Imbestigasyon sang IPPO sa pulis nga nagpamuyayaw sa punong barangay kag nakadisgrasya sa Oton, natapos na

Sta. Barbara, Iloilo — Natapos na ang imbestigasyon sa pagpamuyayaw sang pulis sa punong barangay sang Cagbang, Oton lakip ang pag-drive niya nga naka-inom.

Suno kay Iloilo Police Provincial Office Director Marlon Tayaba, ginsumiter sa iya opisina ni Police Major Raymond Celoso sang Provincial Investigation and Detection Management Section ang iya investigation report sang Miyerkules, Pebrero 27.

Wala nalakip sa report ang ginpahayag pag-inom ni Police Chief Master Sergeant Norman Espina sang nag-drive siya sang Avanza antes nagluntad ang insidente.

Una na gin-ako ni Espina sa interview sang Aksyon Radyo Iloilo nga naka-inom siya sang whisky sang nag-drive antes nasalakay sang iya Avanza ang tatlo ka mga tricycles nga nagapark sa higad sang karsada sang Pebrero 21.

Dugang niya, nabuyayawan man niya si punong barangay Ronnel Caso bangud ginpahayag wala siya sa iya paminsaron.

Wala nadayon sa pagpasaka sang kaso si Kapitan Caso matapos nagpangayo sang pasaylo sa iya ang pulis. (AGB/ATT)