17-anyos nga child in conflict with the law, nakapalagyo sa balay dalayunan sa Lapuz; Solterito, ginkastigo sang kasubong nga mga CICL sang nagbalik sa facility

Iloilo City — Ginkastigo ang 17-anyos nga solterito nga Child In Conflict with the Law sang kasubong nga mga menor sa Balay Dalayunan sa Lapuz.

Ini matapos nagpalagyo si alyas Nonoy sa facility sang Pebrero 23.

Suno kay Beth Sevilla, head sang Balay Dalayunan, matulog na kuntani si Nonoy sang hinali lang ginkadtuan sa iya kwarto sang iban pa nga mga menor kag ginpulihan kastigo.

Apat ka menor ang nag-ako sa pagpangkastigo suno kay Sevilla.

Ginpabutyag naman sang isa sa ila nga nagpalagyo si Nonoy rason ginpulihan nila kastigo.

Ginapatihan nagbatyag ang mga natungdan bangud ginlimitahan ang paghampang nila sang basketball kasunod sang pagpalagyo ni Nonoy.

‘PAGPALAGYO’

Nagpalagyo si Nonoy paagi sa pagsaka sa tangke sang tubig sa facility.

Suno kay Sevilla, ginlagas pa sang ila mga personnel si Nonoy apang wala naabtan.

Nagahampang ang mga menor sang basketball sang nagpalagyo si Nonoy.

SAKIT ANG LAWAS, MAY MGA BAKIRAS

Nagakabalaka ang amay ni Nonoy sa safety sang iya bata kasunod sang insidente.

Suno sa amay nga si alyas Berto, may mga bakiras sa likod si Nonoy kag nagareklamo man sang pagpalanakit sang iya likod.

Indi magpasaka sang kaso ang amay ukon si Nonoy nga gilayon man nga ginbulong kag ginpa medical examination sa ospital.

Ginpahayag gilayon nga nagresponde ang mga personnel sang Balay Dalayunan rason nauntat man gilayon ang pagpangsapute.

ANO ANG AKSYON?

Magluwas sa kinaandan nga mga hilikuton sang mga menor, kinahanglan man tinluan sang nagpangsapote ang pila ka kwarto kag comfort room sa jail facility bilang konsekwensya sa ila ginhimo.

Ginpahanumdum naman ni Sevilla sa ila mga house parents lakip sa mga personnel sang BJMP nga kinahanglan nila mangin alerto agud malikawan ang kasubong nga insidente.

Si Nonoy ang ginkustodiya sa Balay Dalayunan matapos ginserbihan sang warrant of arrest sa kaso nga robbery.

Wala na naga-eskwela si Nonoy nga may pito pa ka mga utod.

Lunsay tricycle drivers ang ila mga ginikanan. (JoMaque)