410 sa 818 ka ginapatihan may tipdas sa Western Visayas, naghalin sa Negros Occidental
Iloilo City – 410 sa 818 ukon masobra katunga sang mga ginapatihan may tipdas sa Western Visayas ang halin sa Negros Occidental.
Base sa record sang Department of Health ukon DOH 6 halin Enero 1 tubtob subong nga adlaw, Marso 1, naglab-ot na sa 298 ang mga may tipdas sa Negros Occidental samtang 112 naman ka mga kaso sa Bacolod City.
Suno kay Dr. Jessie Glen Alonsabe, regional epediomologist sang DOH 6, ‘mobile’ ang kalabanan sang mga pumuluyo sa Negros Occidental bangud mga sakada rason indi sila mabakunahan.
Kapin 43% sang mga ginapatihan may tipdas sa rehiyon ang naga-edad 16-anyos kag pasaka, 22% naman ang 9 ka bulan nga lapsag kag panubo, 7% ang 9 tubtob 11 ka bulan nga lapsag, 19% sa 1 tubtob 5 ka tuig , 5% sa 6 tubtob 10 ka tuig kag 4% sa 11 tubtob 15 ka tuig.
Sa 4 ka mga napatay angut sa tipdas, tatlo ang halin sa Negros Occidental suno sa DOH 6.
‘MASS IMMUNIZATION’
Ginlunsar na sang DOH 6 ang non-selective vaccination sa 18 ka mga Local Government Units sa Negros Occidental kasunod sang mataas nga narecord nga mga kaso sang dengue suno kay Dr. Renilyn Reyes , head sang Family Health and Nutrition Cluster sa DOH 6.
Kasunod sang lihok, kinahanglan bakunahan ang tanan nga anum 6 tubtob 59 ka bulan nga lapsag bisan nabakunahan na sila suno kay Dr. Reyes.
Ini ang ginabugusan sang Cadiz City, Escalante City, Sipalay City, Talisay City, Enrique B. Magalona, Hinoba-an, Isabela, La Carlota City, Las Castellana, Moises Padilla (Magallon), Pontevedra, Pulupandan, Sagay City, Salvador Benedicto, San Enrique, Silay City, Toboso kag Valladolid.
Una na nga ginhiwat ang supplemental vaccination sa 13 ka mga LGUs sa Negros Occidental sang 2018 kag subong naga mapping up sa mga wala pa nabakunahan.
Target sang DOH kag natungdan nga LGU nga pakadtunon ang mga kabataan sa isa ka lugar kag didto hiwaton ang pagbakuna.
Pagasundan man ini sang mapping up agud mabakunahan ang wala nakapasakop sa mass immunization.
‘TUMAN KA DYUTAY SANG NABAKUNAHAN?’
Base sa report sang DOH 6, 9% lukon 45, 364 lang ka mga kabataan nga nagapangedarun 6 tubtob 59 ka bulan ang nabakunahan ipaanggid sa ila target number.
2% naman ukon 3, 957 lang ka mga estudyante halin Grade 1 tubtob Grade 7 ang nabakunahan.
Posible may problema sa reporting sang natungdan nga mga health center representartive suno kay Dr. Reyes rason manubo man ang narecord nila nga impormasyon.
May posibilidad man nga dyutay lang gid man ang nagapabakuna rason kinahanglan ang epektibo nga implementasyon sang programa ilabi sang natungdan nga mga LGU’s.
Sa Marso 18, ilunsar sang DOH 6 ang Knockout Tigdas nga naga-target magbakuna sa 408, 687 tanan ka mga kabataan sa 101 ka natungdan nga mga LGU’s sa rehiyon. (JoMaque/AT)