Delivery boy sang fast food chain, nakabunggo sa pick-up sa Mandurriao

Iloilo City — Nakabunggo sa pick up ang ginasakyan nga motorsiklo sang delivery boy sang McDonald’s-Atria sa Tabucan, Mandurriao.

Ginkilala ang delivery boy kay Cecillo Flores, 27 anyos sang Buray, Oton.

Suno sa driver sang pick up nga si Michael Dela Peña, 39 anyos sang Bitoon, Jaro, paliko na siya para magpatughong sa gasoline station sang hinali lang nga may naglagapok sa likod sang iya salakyan.

Nakita na lang nga nagakulob ang delivery boy sa karsada kag napilpilan sang delivery bag.

Halin sa Sea Oil gasoline station ang delivery boy kag pakadto sa direksyon sang Molo.

Suno kay Police Patrolwoman Vivian Villagracia sang Mandurriao Police Station, conscious sang ginpamangkot niya si Flores apang indi makahulag.

Base sa initial assessment sang ICER, may pilas sa tuhod si Flores.

Gindala sa ospital si Flores. (JoMaque)