Lalaki, gintiro patay sang 2 riding-in-tandem sa City Proper; Biktima, ginakabig nga HVT drug personality base sa record sang Molo Police Station

Iloilo City — Patay ang 40-anyos nga nagapataya sa basketball kag nagabaligya sang baboy matapos gintiro sang duha ka riding-in-tandem sa Mabini Street, City Proper las 12:20 kahapon sang hapon, Marso 2.

Gindala pa sa ospital si Lhuil Clemente sang East Baluarte, Molo apang napatay las 12:39 sang hapon bangud sang pilas sa likod, dughan, tiyan kag ulo suno kay Police Staff Sergeant Rizan Magoliño sang City Proper Police Station.

Suno sa nakakita nga si alyas Bebeng, tag-iya sang kalan-an sa higad sang karsada, ginasundan sang mga suspek ang biktima nga nakasakay sa motorsiklo.

Ginbalabagan suno sa iya sang isa ka riding-in-tandem ang suspek kag gintiro kag gin-finishing pa gid siya sang isa pa gid ka riding-in-tandem.

Ang mga suspek suno sa iya ang naka-jacket, naka-shorts, naka-tsinelas kag naka-helmet. 

Ginabanta sa lima ka lupok ang nabatian sa lugar antes nakita nga natumba sa ginasakyan nga motorsiklo ang biktima.

Narecover sang scene of the crime operatives ukon SOCO sa lugar ang lima ka basiyo kag apat ka slugs sang 45 caliber kag live ammo sang .9mm.

‘High Value Target’

Ginkumpirmar ni Police Captain Victor Bacinillo, deputy chief of police sang City Proper Police Station nga high value target drug personality si Clemente.

Suno kay Bacinillo, nag-surrender sa Oplan Tokhang si Clemente kag nagpaidalum sa rehabilitation program sang PNP pero na-validate nga wala nag-untat sa pagbaligya sang illegal nga druga.

‘Kahisa ang motibo’

Kahisa ang ginatudlo nga motibo sang pamilya ni Clemente sa pagpatay sa ila himata.

Suno kay alyas Toto, manghod sang biktima, madamu ang nagahisa sa iya magulang bangud maayo siya magnegosyo.

Nagabaligya sang baboy kag isda si Clemente.

Ginpahayag ni Toto nga ini ang rason kon ngaa gina-tsismis ang iya utod sa ila lugar nga naangut sa illegal nga druga.

Makapamatuod si Toto nga kontra sang iya utod ang mga illegal nga aktibidad ilabe na ang illegal nga druga. (JoMaque)