MDRRMO head sang San Lorenzo, Guimaras, patay matapos gintiro sang 2 riding-in-tandem

Guimaras – Patay si Municipal Disaster Risk Reduction and Management Office (MDRRMO) head Ezequiel Cabrieto, 58-anyos sang San Lorenzo, matapos gintiro sang duha ka riding-in-tandem sa Barangay Cabungahan, las-6:48 kagab-i, Marso 3.

Ini ang ginkumpirmar ni Police Corporal Edwin Alacar, imbestigador sang San Lorenzo Municipal Police Station.

Suno kay Alacar, naga-inom-inom sa likod sang ila tiangge si Cabrieto upod ang iya duha ka bayaw sang ginpalapitan sang suspect nga naka-jacket, naka-bonnet kag naka-mask kag gintiro.

Nakuhaan sang CCTV camera nga antes natabu ang insidente, may duha ka motorsiklo nga nagapabalik-balik malapit sa tiangge sang biktima.

Gintuyo nga yudyudon sang suspek ang biktima paguwa pero nagpanginpadlos siya. May natabu pa suno kay Alacar nga komprontasyon sa tunga sang suspek kag biktima.

Ginpahayag naman ni Alacar nga nagbulig ang isa pa ka kaupod sang suspek sa pagyudyod sa biktima.

Kasunod sini, gintiro sang suspek ang biktima kag napilasan sa iya likod kag panga. May pilas man siya sa dughan pero indi pa matul-id kon diin ang exit kag entrance sang bala nga nag-igu sa iya. Gilayon nga gindala sa ospital si Cabrieto pero gindeklarar nga dead on arrival sang doktor.

Blangko pa ang San Lorenzo police sa identity sang mga suspek kag motibo sang krimen. (JoMaque)