13 incumbent politicians sa Western Visayas lakip ang 7 reelectionists, nalakip sa narco-list – PDEA 6 Director

Iloilo City – Ginconfirmar ni Philippine Drug Enforcement Agency (PDEA) 6 Director Alex Tablate nga 13 ka incumbent politicians sa Western Visayas, pito diri ang reelectionists, ang nalakip sa narco list nga ila gina-uyatan.

Suno kay Tablate, ang ginpahayag nga narco politicians pareho man sa daan nga listahan nga ginapa-validate sa PDEA kag iban pa nga law enforcement agencies.

Halin ang 13 sa lain-lain nga probinsya sa rehiyon kag mayorya sa ila ang gin-categorize nga drug protectors. Vice Mayor pasaka naman ang posisyon sang mga ara sa listahan.

Sa pagkadumdom ni Tablate may tatlo tubtob apat ang halin sa Iloilo.

Gin-athag ni Tablate nga posible madugangan ukon mabuhinan ang ara sa listahan bangud madamo sang intelligence sources si Presidente Rodrigo Duterte. (Ariel Solacito)