Wala natabu–Alimodian Mayor Kalay Alonsabe sa ginpahayag ‘tigulang na’ statement ni Cong. Biron kontra kay Gov. Defensor

Iloilo City–Wala sang pagtililipon sang mga senior citizens sa Alimodian sang weekend.

Ini ang ginpahayag ni Alimodian Mayor Geefre “Kalay” Alonsabe bilang reaksyon sa isyu nga nakabuya sang statement si 4th District Congressman Ferj Biron kontra kay Governor Art Defensor nga “Si Defensor tigulang na nga gobernador. San-o pa na siya mapatay man? Pabusla nyo man iban gobernador.”

Sa post sang utod ni Governor Defensor nga si Ed Defensor sa Facebook, ginpahayag nga nakalab-ut sa iya ang impormasyon tuhoy sa ginbuy-an ni Biron nga mga tinaga sa assembly sang mga tigulang sa Alimodian.

Pero suno kay Alonsabe wala nakatipon ang mga seniors sa ila banwa sang weekend kag Oktubre sang nagligad nga tuig pa nakatambong si Biron sa pagtililipon sang mga tigulang.

Ulihi nga nakakadto si Biron sa banwa sang Pebrero 24 kag 25 pero indi ini event sang mga senior citizens. Yara sa Manila si Alonsabe sang amo nga tiun.

Dugang niya, bisan ang presidente sang Office of the Senior Citizens Affairs (OSCA) nila ang nagsugid sa iya nga wala sang statement nga ginbuy-an si Biron batuk sa gobernador.

Gin-ako ni Alonsabe nga nagasuporta siya kay Biron bangud isa sila ka partido.

Si Biron ang nagakandidato sa pagka-gobernador bunggo sa bata sang gobernador nga si 3rd District Congressman Toto Defensor. (JoMaque)