80% sang mga nadakpan angut sa illegal nga druga sa Western Visayas, newly-identified drug personalities – PRO 6
Iloilo City — Naglab-ot sa kapin 80% ukon 2,169 sa 2,628 sang mga nadakpan angut sa illegal nga druga sa Western Visayas ang newly-identified drug personalities ukon wala sa drug watchlist sang pulis.
Suno kay Police Regional Office 6 Spokesperson PSUPT Joem Malong, 459 lang sa mga nadakpan ang nalakip sa ila listahan nga halin Disyembre 5, 2017 tubtob Marso 4, 2019.
Ginpahayag ni Malong nga listed drug personalities ang target sa ila operations apang lakip sa mga nagakadakpan ang wala nalakip sa ila drug watchlist.
Dugang niya, posible nag-untat man sa illegal drug trade ang mga nalista nila nga drug personalities rason wala na-subject sa police operation.
NAGHINA ANG RELOADING
Naghina ang ‘reloading’ sang mga pulis angut sa Oplan Double Barrel Reloaded suno kay Malong bangud may mga barangay officials nga wala na naga-submit sang ila report angut sa mga drug personalities sa ila barangay.
Posible nahadlok ang mga barangay officials suno kay Malong rason wala na naga-cooperate sa mga pulis.
Base sa Joint Memorandum Circular No. 2018-01 sang Department of the Interior and Local Government kag Dangerous Drugs Board, dapat magsumiter sang report ang Barangay Anti-Drug Abuse Council ukon BADAC sa ila Municipal Anti-Drug Abuse Council (MADAC) ukon City Anti-Drug Abuse Council (CADAC) kada bulan.
Sa pinakaulihi nga record sang PRO 6, 40 lang ang nadugang nga mga drug personalities sa una na nila nga record nga 2,103 sang ginlunsar ang Oplan Double Barrel Reloaded.
GINAMONITOR ANG MGA NAGSURRENDER
Gin-ako naman ni Malong nga ginamonitor sang mga pulis ang mga nag-surrender matapos gin-tokhang.
Suno kay Malong, mangin kabahin na sang ila drug watchlist ang mga nagsurrender matapos gintokhang.
Ang ini nga listahan ang ginasumiter naman sang PRO 6 sa Directorate for Intelligence para sa validation.
Gin-ako man ni Malong nga source ang PRO 6 sang PRRD list ukon sang drug list ni Presidente Rodrigo Duterte nga ginpaguwa sang 2016.
Sa 2,143 ka mga drug personalities sa rehiyon, 894 sa ila ang gin-tokhang samtang nag-surrender naman ang 1,026.
193 sa 1,026 ka mga nagsurrender ang wala sa drug watchlist sang PRO 6.
Ginpahayag 61 naman ang wala nag-surrender samtang 976 ang indi na makita sa ila barangay.
5 LANG SA MGA HOMICIDE CASES ANG DRUG RELATED?
Sa 2,195 ka mga homicide cases halin Hulyo 1, 2016 tubtob Marso 6, 2019, lima lang ka mga kaso ang kumpirmado nga may kaangtanan sa illegal nga druga.
28 naman ka mga kaso ang ginapatihan nga may kaangtanan sa illegal nga druga.
106 ka mga kaso ang undetermined ukon wala pa natul-id kun ano ang motibo kag kun sin-o ang suspetsado sa krimen. (JoMaque)