Amoebiasis, rason sang pagsakit sang tiyan sang pila ka barangay officials nga nagtambong sa seminar sa hotel sa syudad

Iloilo City — (UPDATE) Amoebiasis ang rason sang paglain sang tiyan sang pila ka barangay officials nga nagtambong sa seminar sang Department of Budget and Management sa Iloilo Grand Hotel.

Base ini sa pagpangusisa sang City Health Office.

Suno kay City Health officer Dr. Bernard Caspe, lunsay out patient ang anum ka barangay officials nga gindala sa Iloilo Doctor’s Hospital.

May apat pa ka iban nga gindala man sa The Medical City.

Ginpahayag ni Caspe nga ang amoebiases posible maghalin sa pagkaun ukon tubig pero indi pa nila ma-establisar kun sa hotel ini nakuha sang mga naglain ang pamatyag ilabe na nga nagalagaw man suno sa iya ang pila ka participants.

Masobra sa 300 ang participants sa seminar.

Suno kay Caspe, ginsabat sang hotel management ang bulong sang mga pasyente nga halin sa Pototan kag Buruanga, Aklan. (JoMaque)