Mag-abyan, nabun-an kag ginpulihan kastigo sang grupo sang mga lalaki sa New Lucena

New Lucena, Iloilo — Gindala sa Western Visayas Medical Center ang duha ka lalaki matapos nabun-an sa nagluntad nga rambol sa Brgy. Pasil, New Lucena las 11 kagab-i, March 9.

Ginkilala ang mga biktima nga sanday Junmar Abugadil, 26 anyos, may pilas sa wala nga dughan kag Michael Soloren, 24 anyos, may pilas sa tuo nga butkon.

Suno kay Soloren, pakadto na sila sa baylehan ni Abugadil sang ginpalapitan sila kag ginsita sang anum ka mga lalaki nga ginpahayag mga pangayaw.

Hinali lang sila nga ginpulihan tubtob nga nagrambol. Una nga nabun-an si Soloren.

Sang nagtambag ang mga pumuluyo sa gamu, madasig nga nagpalagyo ang mga suspetsado sakay sa multicab.Pero ginlagas sang mga tanod ang salakyan kag ginpalukpan ang royda.

Nadakpan ang mga suspect kag preso na sa New Lucena Police Station.

‘HINUBOG ANG RASON’

Suno kay PO3 Cosmiflor Marco, imbestigador sang New Lucena Police, posible hinubog ang rason sang insidente bangud indi kilalahay ang grupo sang mga suspetsado kag ang mga biktima kag pareho nga nakainom.

Ginatudlo si Marvin Sibaldo, 21 anyos sang Brgy Burot, New Lucena nga nagbuno sa duha ka biktima.

Magluwas kay Sibaldo, arestado man sanday Ryan Suarez, 20; Rogelio Baldia, 21; mag-amay nga Enrico Simple, 49 kag Eric John Simple, 25; kag si alias Toto 16 anyos, tanan residente sang Brgy Burot.

Una nga gin-custody sang mga tanod sanday Sibaldo, Suarez, kag ang 16 anyos nga solterito samtang nagtuyo pa nga magpalagyo sakay sa multicab sanday Baldia kag ang mag-amay nga Simple pero nadakpan.

Iga-turn over sa DSWD ang nadakpan nga menor-de-edad. (JoMaque)