TF ASIS, gin-isyuhan ni City Administrator Hernando Galvez sang Cease and Desist Order angut sa pag-demolish sa gym sang Progreso, Lapuz
Iloilo City – Ginpangayuan ni City Administrator Atty. Hernando Galvez sang paathag sanday Engr. Roberto Dumanil kag Mr. Melvin Sorongon sang Task Force ASIS angut sa pag-demolish sang gym sang Progreso, Lapuz sa pihak sang pagpamalabag sang mga pumuluyo.
Nag-isyu si Galvez sang Cease and Desist Order sang Marso 6 matapos nagreklamo si Progreso Barangay Kagawad Julie Ann Lapating.
Isa si Lapating sa mga nagapamalabag sa pagpaguba sang gym bangud suno sa iya, sala ang papeles sang demolition team. Isa sa mga ginareklamo ni Lapating ang nakabutang sa report sang Task Force ASIS nga tuktukon ang atop sang gym kag delikado para sa mga pumuluyo. Suno sa kagawad, baliskad ini sa aktwal nga itsura sang gym nga bag-o kag mabakod pa ang atop.
Tatlo ka adlaw ang ginhatag ni Galves sa taga-Task Force ASIS agud maka-submit sang ila explanation.
Una na gin-report nga gina-claim na sang tag-iya sang duta ang iya propedad nga ginatindugan sang gym rason nga gin-demolish ini. (JoMaque)