Councilor Plaridel Nava, gintudlo ang bata ni Dr Pacita Gonzales nga si Dr. Marigold Gonzales nga ginhalinan sang indi pag-intiendihanay sang Team AlGoNa
Iloilo City — Si Dr. Gold Gonzales, bata ni Dr. Pacita Gonzales ang nagtuga sang gamo sa Team AlGoNa.
Suno kay Councilor Plaridel Nava, “politically immature” kag may “attitude problem” si Doc Gold: “She rocked the boat.”
Humalin pa sang Oktubre 2018 suno kay Nava nga nagapahilabot si Doc Gold sa ila kampanya.
Madamo suno kay Nava sang proposal nila ni Alim para mapaayo ang rating ni Dra. Pacita pero gina-reject ni Doc Gold.
Madamo suno kay Nava sang ila mga political leaders kay Doc Gold bangud sa indi maayo nga pagtrato sa ila kabangdanan nagsaylo sila sang suportahan nga mayor.
Sang damlag suno kay Nava, nangayo sila sang otoridad kay Dra. Pacita nga magnegosyar sa mga nagsaylo nga leaders para magbalik pero gulpi lang nagsinggit si Doc Gold nga, “No way mommy! Kuwarta lang na ang gusto nila.”
Suno kay Nava, indi tanan nila nga leaders dalal-un sa kuwarta.
Bastos suno kay Nava si Doc Gold bangud sekreto sila nga gina-record kun magpangampanya kag gina-akusaran nga wala ginadala sa ila kampanya si Dra. Pacita.
Ginpahayag ni Nava nga nadala gid sa “barina” ni Doc Gold si Dra. Pacita kag gintawgan siya sang nagligad nga adlaw kag ginhambalan nga “Tell Joshua I am ordering you to drop all your leaders nga indi sa akon, kay kun indi, ako na lang isa makampanya sa lawas ko, kaya ko man kay may kuwarta kami.”
Tuman suno sa iya ka akig si Dra. Pacita. Gin-block man siya sa Facebook ni Doc Gold.
Suno kay Nava matuod nga may kuwarta ang mga Gonzales pero daw gina-nerbiyos man sila maggasto.
Madugay na ini suno kay Nava nga isyu kag ginhawa nila ka tago agud mapabilin nga intact ang grupo.
Pero napuno na siya sa ginaobra ni Doc Gold nga iya ginlaragway nga “obstruction sa grupo,” “mauti” kag “masabad.”
Suno kay Nava, gusto niya nga i-preserve ang grupo pero sa kundisyon nga palakton ni Dra. Pacita sa Amerika si Doc Gold kag indi na mag-intra sa kampanya.
Dugang ni Nava, mapierde sila kun si Doc Gold ang mangin campaign leader nila.
Nagtawag man suno kay Nava si Dra. Pacita sa iya kag nag-ayo nga magsapol sila.
‘WALA DAPAT I-CONFIRM’
Suno naman kay Doc Gold, wala siya sang dapat i-confirm bangud ang statement sang pagbulag sang team AlGoNa, wala naghalin sa iya.
Dugang niya, indi man partido ang AlGoNa kundi may pareho lang nga advocacy ang iya iloy kag sanday Councilors Nava kag Alim.
Sa karon suno kay Doc Gold, nagakampanya gihapon sila para sa AlGoNa. (JoMaque)